Силно невреме со град и дожд околу пладне го погоди Охрид

Невреме со силни врнежи од град, дожд и грмежи денеска околу пладне го зафатија Охрид. Фотографии од читатели беа испратени до редакцијата на Мета.мк, на кои се гледаат бели улици од силниот град. Дождот ги преполнил шахтите на охридските улици, но засега нема официјални информации за предизвикани штети од денешното невреме.

Се стравува дека невремето предизвикало штети на земјоделските култури во Охридскиот регион, но општинскиот кризен штаб треба допрва да објави детали во врска со настанатите штети.

Инаку, Управата за хидрометеоролошки работи (УХМР) предупредува дека во текот на претстојното попладне на целата територија на земјава ќе има нестабилна облачност со врнежи од дожд и грмежи, а во делови од Македонија се можни поинтензивни процеси во форма на невреме со обилен дожд за кратко време, електрични празнења, силен град и појава на град.

Извор: МЕТА