По новогодишните и божиќните празници грипот зема се поголем замав, а граѓаните немаат мир ниту од новите соеви на ковид,коишто се шират многу побрзо од порано. Последниот извештај на Институтот за јавно здравје (ИЈЗ) покажува дека во текот на првата недела од 2024 година, од 1 до 7 јануари, во земјата се пријавени 1.025 случаи на заболени од грип или заболувања слични на грип. Тоа е 2,5 пати повеќе во споредба со претходната недела. Бројот на пријавени лица оваа недела, споредено со прва недела од минатата сезона, е зголемен за 24,8 проценти.
Во вирусолошката лабораторија на ИЈЗ пристигнале 37 материјали од рутинскиот надзор за лабораториско тестирање, паралелно тестирани за грип и Ковид-19 (SARS-CoV-2). Притоа, детектиран е 21 позитивен случај на Influenza, 19 А(H1)pdm09 и по еден Influenza А(H3) и Influenza А – несубтипизиран. Регистриран е и по еден пациент со респираторен синцицијален вирус (RSV) и SARS-CoV-2.
„Пријавената инциденца за првпат оваа сезона е над неделната граница на сезонската активност на вирусот на грип, односно достигнат е прагот на влез во сезоната на грип“, наведуваат од ИЈЗ.
Најголемиот број од заразените – 544 лица се на возраст од 15-64 години, 233 примероци се од деца на возраст од 5-14 години, 185 се деца на возраст од 0-4 години и 63 случаи се регистрирани кај лица на возраст над 65 години. Највисока инциденца се регистрира кај децата на возраст до четири години.
Два смртни случаи
Најмногу заболени од грип има во Скопје, Дебар, Гостивар, Штип и Битола.
„Во текот на оваа недела, регистрирани се два смртни случаи асоцирани со грип. Се работи за лица на возраст од 56 и 61 години од Скопје и Куманово, кои биле хоспитализирани на Клиниката за пулмологија и алергологија. Кај починатите лица е утврдено присуство на коморбидитети – кардиоваскуларни и белодробни и не биле вакцинирани со вакцина против сезонски грип. Кај починатите лица, лабораториски е потврдена Influenza А(H1)pdm09“, посочуваат од ИЈЗ.
![вакцина вакцина](https://static.dw.com/image/56146635_906.jpg)
Вакцина за најефикасна заштита
Вакцинацијата против сезонски грип е најефикасна заштита од ова заболување. Институтот за јавно здравје препорачува вакцинација на целото население, особено на лица од ризичните групи – лица над 65 години, деца, лица со хронични болести, бремени жени, како и здравствени работници.
Министерството за здравство обезбеди бесплатна четиривалентна вакцина од 60.000 дози, наменета за приоритетни групи население. Дополнителни 15.000 дози се обезбедени преку донација.
На 25.10.2023 година започна вакцинацијата против сезонски грип. Заклучно со првата недела од оваа година вакцинирани се вкупно 60.766 лица со бесплатна или комерцијална вакцина.
Комисијата за заразни болести најави дека деновиве ќе заседава, но дека нема ништо алармантно во однос на магарешката кашлица, ковид и грип. На крајот на февруари се очекува пикот на сезоната на грип и слични болести на грип.