Бројот на загинати во стампедото на хиндуистички верски собир во северна Индија се искачи на 121, јави новинската агенција АНИ, а според полицискиот извештај на настанот присуствувале неколкупати повеќе лица од дозволеното.
Несреќата се случи во село во областа Хатрас, на околу 200 километри југоисточно од главниот град Њу Делхи. Според податоците на регионалната управа, илјадници луѓе се собрале на молитва и проповеди. Еден локален гуру организирал средба во шатор. Некои луѓе се онесвестиле поради високата влажност, изјави Чаитра В од регионалната администрација на Утар Прадеш. Кога луѓето се обиделе брзо да излезат од шаторот, некои од нив паднале – што довело до масовна паника.
Полицијата дозволила да се соберат 80.000, а околу 250.000 луѓе присуствуваале на настанот, според полицискиот извештај во кој имала увид новинската агенција Ројтерс.
Главниот министер на Утар Прадеш формирал комитет од високи полициски и административни службеници за да го истражат инцидентот. Полицијата добила пријава и сега трага по Гуру Нарајан Сакар Хари, кој е познат и како Боле Баба. Неговиот помошник за телевизијата Индија тудеј изјави дека е дадена дозвола за собирот, но се појавиле повеќе луѓе од очекуваното.
Најмалку 121 лице загинале, а 28 се повредени, јави агенцијата АНИ, повикувајќи се на локалните власти. Меѓу жртвите има 108 жени и седум деца, изјави за новинарите Маној Кумар Синг, главен секретар на државата Утар Прадеш.
Во Индија, фатални несреќи постојано се случуваат на маргините на религиозните настани. Во 2016 година, најмалку 112 луѓе загинаа поради забранет огномет во храмски комплекс во државата Керала. Во 2013 година, 115 верници беа убиени во стампедо на мост во близина на храм во државата Мадја Прадеш. Исто така, во стампедо во 2008 година, повеќе од 220 аџии загинаа во храм во северниот град Џодпур.