САД: Уапсени двајца водачи на картелот Синалоа

Мексиканскиот нарко-бос Исмаел „Ел Мајо“ Замбада и синот на неговиот поранешен партнер, Хоакин „Ел Чапо“ Гузман, се уапсени во четвртокот во Ел Пасо, Тексас, соопшти американското Министерство за правда.

„Министерството за правда уапси уште двајца наводни водачи на картелот Синалоа, една од најнасилните и најмоќните организации за трговија со дрога во светот“, се вели во соопштението на Министерството.

Замбада и Хоакин Гузман Лопез, синот на Ел Чапо, се соочуваат со повеќе обвиненија во САД „за водење на криминални операции на картелот, вклучително и производство на фентанил и мрежи на трговија со дрога“, се вели во соопштението.

Две американски официјални лица изјавија за Ројтерс дека Замбада и Гузман Лопез биле приведени откако слетале со приватен авион.

Замбада го основаше картелот Синалоа заедно со Ел Чапо, кој беше екстрадиран во САД во 2017 година и отслужува доживотна затворска казна во затвор со максимална безбедност.

По екстрадицијата на Ел Чапо, неговата криминална империја ја наследија неговите четири сина – познати како Лос Чапитос или малите Чапоси – кои ја презедоа неговата фракција во картелот и станаа еден од најголемите извозници на фентанил во САД.

Фентанил е синтетички опиоид кој е до 50 пати посилен од хероинот и 100 пати посилен од морфиумот.