Централна Европа се бори со разорни поплави

Жителите и властите низ Централна Европа продолжуваат да се борат со поплавите и обилните врнежи кои го погодина регионот. Најлоша е ситуацијата во Романија, каде властите соопштија дека загинале четири лица. Еден смртен случај е пријавен во Полска, а три лица се водат за исчезнати во Чешка.

Дождовите, исто така, ги натераа екипите за помош да дејствуваат и во делови од Австрија и ниските области на Чешка и Полска каде жителите беа евакуирани бидејќи се прелеа браната во Миеџигорзе.

Романија, која веројатно е најпогодената земја, посериозните поплави зафатија околу 20 општини во осум романски области.

Оштетени се повеќе од 5.000 куќи, а стотици жители се евакуирани.

Премиерот Марсел Чиолаку за време на посетата на една од најпогодените области, Галати, најави привремени засолништа за луѓето загрозени од поплавите. Тој рече дека спасувањето животи е прв приоритет на службите.

Четири лица загинаа во поплавите во Романија во изминатите 24 часа, соопштија властите.

Романскиот Национален институт за хидрологија и водостопанство издаде црвен аларм за регионите Галати и Васлуи додека спасувачите, вклучително и со воени чамци и други средства, се обидоа да стигнат до заробените жители, од кои некои беа принудени да се качат на покривите за да се спасат.

На некои места поплавите со вода достигнаа и до три метри длабочина.

Во меѓувреме, управата за водоснабдување во Вроцлав, југозападна Полска, соопшти дека ситуацијата е критична откако се прелеа браната висока речиси 30 метри во долината Клоѓко на границата на Полска со Чешка, поради што се евакуирани жители.

Во Австрија десетици општини се прогласени за зони на катастрофа.

Во чешкиот главен град, Прага, властите воведоа мерки за спречување на поплави.

Пообилни врнежи сè уште се предвидуваат за Австрија, Чешка, јужна Германија, Унгарија, Полска и Словачка.

Синоптичарите велат дека до 15 септември, во дел од областите може да паднат повеќе од една третина од просечните годишни врнежи.

Силните ветрови дополнително ја усложнуваат ситуацијата.

Извор: РСЕ