Мицотакис: Да се почитува Договорот од Преспа бидејќи Скопје е изолирано, а не Грција

Грчката влада нема да бара ратификација на трите меморандуми за соработка потпишани со Северна Македонија кои се однесуваат на прашања како што се процесот за пристапување во ЕУ сè додека Скопје целосно не го испочитува Договорот од Преспа потпишан во 2018 година, изјави денеска грчкиот премиер Киријакос Мицотакис, а пренесува „Екатимерини“.

„Во овој момент, ние нема да продолжиме со ратификацијата на меморандумите. Ратификацијата ќе му даде моќ на Скопје“, рече тој.

Според него, неговите колеги во Северна Македонија треба да признаат дека изборниот период заврши.

„Скопје е изолирано, а не Грција. Договорот од Преспа мора да се почитува. Верувам дека ќе се прилагодат на притисоците со кои ќе се соочат“, рече Мицотакис и порача Северна Македонија сериозно да ги сфати своите одговорности и да престане да се занимава со ситни политички маневри.

Екатимерини потсетува дека новоизбраната претседателка на Северна Македонија, Гордана Сиљановска Давкова избегна да го користи уставното име како што е предвидено во договорот од Преспа, што пак, предизвика дипломатски спор со Грција.

Извор: МЕТА