Маричиќ: Пуштањето од притвор на Мијалков, дополнително ја намалува и онака разнишаната доверба на граѓаните во судовите

Поранешниот директор на УБК,Сашо Мијалков, излегува од притвор откако судот ја прифати понудената гаранција од 11 милиони евра. Мијалков од 26 февруари е во притвор во Затворот Скопје. Тој неправосилно беше осуден на осум години затвор заслучајот „Трезор“, за набавка на британска опрема за следење на електронската комуникација за УБК. Првостепена пресуда од 12 години затвор има и за случајот „Таргет – Тврдина“ за нелегалното прислушување, а во тек се и неколку други предмети за коишто е обвинет.

Тој ќе биде пуштен на слобода откако Апелацискиот суд во Скопје ја прифатил гаранцијата од 11.106.501 евра. Неговата жалба била уважена и решението за притвор е преиначено со прифаќање на гаранцијата во имот.

Поранешниот прв човек на тајната служба ќе излезе од притвор кога ќе завршат административните процедури со ставање под хипотека на имотот што е понуден како гаранција. За да се спречи бегство, судиите му определиле мерки на претпазливост, со коишто ќе му биде одземен пасошот и има обврска да се јавува во судот.

Пролетва, Кривичниот совет на одделението за организиран криминал и корупција ја одби понудената гаранција, со која што се согласи обвинителството, со образложение дека сѐ уште постојат причини поради кои била определена мерката притвор, меѓу кои и опасност од бегство. Обвинителството, пак, сметаше дека гаранцијата е прифатлива за да се обезбеди присуство на обвинетиот до правосилноста на пресудата.

По однос на донесената пресуда на Апециониот суд, се огласи и министерот за правда, Бојан Маричиќ:

„Одлуката на Апелациониот суд во Скопје да го пушти од притвор Сашо Мијалков ја намалуваат и онака разнишаната доверба на граѓаните во судовите. Потсетувам дека Мијалков беше лице под реален ризик за бегство и повод за настани кои ја вознемирија целата македонска јавност. 

Судиите на Апелациониот суд во Скопје, Ѓоко Ристов и Енвер Беџети кои ја донесоа оваа одлука, треба да и’ објаснат на јавноста на кој основ ја донеле ваквата одлука и на кој начин ќе ја преземат одговорноста доколку се случи повторно ризик од бегство. Судот, иако е независен, должен е јавно да ги објаснува своите одлуки за да можат граѓаните да веруваат во судството“, напиша Маричиќ на својот фб профил.