Опозицијата во Собранието на Република Северна Македонија да предложи датуми и надлежна комисија на која ќе биде претставен Договорот за изградба на Коридорите 8и 10Д пред пратениците, било договорено на денешната редовна координација во Парламентот.
Претседателот на Собранието Талат Џафери на 2 мај имаше средба со координаторите на пратеничките групи и претставниците на политичките партии, но на координациите не присуствуваат претставници на ВМРО-ДПМНЕ, најголемата опозициска партија во Парламентот.
„Ставот на присутните на координацијата е дека, со оглед на тоа што иницијативата е на опозицијата, а опозицијата не присуствува на координација; опозицијата да предложи надлежно тело за разгледување на Договорот до претседателот и да определи датум кога ќе се разгледа Договорот. Веднаш по отворањето на комисиската седница, пратениците ќе се изјаснат за затворање на седницата за јавноста“, се вели во соопштението од координација во Собранието.
Договорот е класифициран, односно само пратениците кои се носители на безбедносен сертификат ќе може да имаат увид во неговата содржина, се наведува во сопштението,
Пратеникот на ВМРО-ДПМНЕ, Антонијо Милошоски денеска преку објава на својот Фејсбук профил посочува дека владејачкото мнозинство во Собранието, како што пишува, ќе се обиде на координација да наоѓа изговори како пратениците да не го добијат Договорот со „Бехтел и Енка“.