Во Брисел средба Вучиќ-Курти

За прв пат оваа година, српскиот претседател Александар Вучиќ и косовскиот премиер Албин Курти денеска ќе се сретнат во Брисел како дел од дијалогот за нормализација на односите.

Средбата на лидерите како дел од дијалогот ќе се одржи во моментот кога истекува мандатот на европските претставници откако речиси пет години се ангажирани во процесот на нормализирање на односите.

Жозеп Борел ќе ја извршува функцијата шеф на европската дипломатија до есен. Оваа недела ќе се знае кој ќе го наследи. Мирослав Лајчак е назначен за амбасадор на Европската Унија во Швајцарија, но ќе дејствува како посредник во дијалогот додека не се најде негова замена.

Најверојатно ова ќе биде последната средба од дијалогот чиј домаќин е Борел. Никој од ЕУ нема големи очекувања за средбата во среда. Со оваа средба европската страна сака да покаже дека дијалогот не е мртов.

Се што очекува ЕУ од лидерите на Србија и Косово е да ја потврдат посветеноста на договорите постигнати минатата година во Брисел и Охрид. Без разлика на недостигот на потписи, од ЕУ нагласуваат дека договорите се правно обврзувачки за двете страни.

Српскиот претседател Александар Вучиќ и косовскиот премиер Аљбин Курти последен пат се сретнаа на 14 септември минатата година. Потоа се разговараше за имплементацијата на планот за договор што лидерите го постигнаа претходно во 2023 година во Брисел и Охрид.

Таа средба беше неуспешна, а заврши со тоа што косовскиот премиер отворено го обвини европскиот посредник Лајчак дека „не е неутрален“.

Договорите што беа постигнати на 27 февруари 2023 година во Брисел и анексот за спроведување што беше договорен на 18 март 2023 година во Охрид, немаат лидерски потпис бидејќи претседателот на Србија редовно го одбиваше.

Ниту една страна не постигна напредок кон спроведување на кој било елемент од овие договори. На крајот на октомври, имаше уште еден неуспешен обид за зближување на страните, каде беа вклучени и клучните лидери од европските земји: германскиот канцелар Олаф Шолц, францускиот претседател Емануел Макрон и италијанската премиерка Џорџа Мелони.

Курти и Вучиќ имаа одвоени средби со европските лидери, но договор не беше можен. Курти инсистираше на потпишување на пакет-договорот, а Вучиќ продолжи да го одбива.

Извор: РСЕ